Er kominn með Mastersgráðu í tryggingastærðfræði. Vörnin gekk ansi vel í gær. Championship Manager 2007 var að því tilefni gefinn út í gær. Það getur ekki verið tilviljun.
Þórir
Í dag fórum við í Paradís ísbúðina með Emblu, Birnu og Sigga. Þegar við nálguðust íbúðina heyrist í Fjalari Hrafni, "ég sé hana, ég sé ísbúðina". Enn var talsverður spotti í ísbúðina og Þórir sagði víst eitthvað á þá leið að það væri svo langt í hana að hann gæti nú varla séð hana strax...... "ja se, pabbi, ég er með svo löng augu að ég get séð". Þetta er nú einn þessara gullmola sem maður verður að muna.
Védís
Einn dag í þeirri viku sem Fjalar Hrafn er í bæjar-hópnum taka börnin fullan þátt í undirbúningi hádegismatarins. Þá er hverju barni gert að koma með eitthvað fyrirfram ákveðið. Fram að þessu hefur Fjalar komið með 1Kg af gulrótum og 3 dósir af túnfisk. Á miðvikudaginn síðasta var hann hins vegar vinsamlegast beðið um að koma með súkkulaði-álegg. Súkkulaði-álegg hefur aldrei, og mun líklega seint, verða keypt á mitt heimili og því er finnst mér það svolítið einkennilegt að leikskólinn sjálfur ýti undir svona. Þetta minnir mig á það þegar Fjalar Hrafn borðaði sælgæti í fyrsta sinn. Það var í desember 2004 þegar börnin á Svanereden fengu nammi í jóladagatalinu nokkra daga. Ég spurði einn starfsmann á leikskólanum hans Fjalars hvað þeim finnst um þegar börnin koma með súkkulaði á brauðið sitt og svarið var að það væri í lagi stöku sinnum en jógúrt væru þeir algerlega á móti vegna mikils magns sykurs í því.
Þórir
Við vorum með matarklúbbinn í gær. Að þessu sinni ákvað ég að elda íslenskan saltfisk. Í stað þess að sjóða hann bara fékk ég uppskrift hjá Stellu af nokkurs konar plokksaltfisk. Reyndar hljóðaði uppskriftin nokkurn veginn á þessa leið: "Sjóðið saltfisk og kartöflur. Á meðan kartöflurnar eru skrældar skal saltfiskurinn liggja í helling af olívuolíu. All er svo maukað saman með miklum hvítlauk og mikilli olívuolíu. Þetta er svo sett í eldfast mót og parmesan-ostur rifin yfir og hitað upp í ofninum". Það sem slæmt var við þessa uppskrift var, að ekki voru nein hlutföll nefnd og því þurfti ég að prófa mig áfram. Undir lokin hafði ég notað 1 kíló af kartöflum, 1200 gr af saltfisk, 3/4 hvítlauk og 400 ml af olívuolíu. Skemmst er frá því að segja að þetta smakkaðist andskoti vel, fiskurinn hefði reyndar mátt vera aðeins saltari. Allur matarklúbburinn var sáttur og meira að segja börnin borðuðu vel. Þetta er þá í annað sinn sem ég elda saltfisk á síðustu þremur vikum. Þegar mamma var einmitt í heimsókn, steikti ég saltfiskinn. Eftir þessar saltfisktilraunir verður erfitt að "bara" sjóða hann.
Þórir
Tónleikarnir tókust með miklum ágætum og við erum strax farnir að hugsa um þá næstu. Skemmst er frá því að segja að þeir stóðu undir sér og gott betur en það. Þetta hafa þó verið ansi erfiðir dagar fyrir tónleikahaldarana. Miðvikudagskvöldið endaði í fylleríi (með Stafræni Hákoni) með tilheyrandi þynnku daginn eftir. Fimmtudagskvöldið fór í að kynnast meðlimum Singapore Sling og koma þeim fyrir í Kaupmannahöfn. Þá nóttina svaf ég 4 tíma. Föstudagurinn var svo algert "hell". Það er ansi margt sem tónleikahaldarar þurfa að hugsa um og dagurinn varð því ansi langur. Hófst klukkan 8 og endaði klukkan hálf þrju um nóttina. Aðfaranótt laugardags svaf ég 5 tíma því við þurftum að mæta snemma upp í Loppen og skila öllu dótinu og ganga frá. Það var því ansi þreyttur gjaldkeri Beatless Propaganda sem lagðist á koddann hálf tíu í gærkveldi. Ekki skemmdi það svo fyrir að Védís leyfði mér svo að sofa út í morgun.
Eins og margir hafa tekið eftir þá er ekki hægt að skrifa comment við færslurnar. Ég hef tilkynnt þetta vandamál til Tripod og eru þeir að vinna í þessum "as we speak", ef ég skil svar þeirra rétt: "Our engineering team is currently evaluating the root cause of the issue that you're experiencing, and will hopefully have it resolved as soon as possible
".
Þórir
Vil bara benda fólki á Musik Foreningen sem ég, ásamt Hjalta og Eggerti eru búnir að stofna. Fyrstu tónleikarnir á okkar vegum verða næstkomandi föstudag, 22. september í Loppen.
Ég skilaði mastersritgerðinni minni í gærdag. Mikill léttir og nú verður tekið 10 daga frí frá "Heavy-Tailed Multivariate Distributions for Insurance Losses" eða þar til ég þarf að undirbúa vörnina. Hún verður þann 13. október næstkomandi.
Síðustu tvær vikur hafa verið nokkuð erfiðar, ég á endasprettinum og Védís að byrja sitt nám. Til þess að létta undir hjá okkur, kom mamma og var hjá okkur í 10 daga og sá um heimilið, uppvask, þvott, þrif og þvo kaffibollann minn. Alveg ómetanleg hjálp sem erfitt verður að endurgjalda.
Það mun ekki líða svo langur tími á milli dagbókarskrifa framvegis.
Þórir
Pabbi var að labba út úr dyrunum rétt í þessu. Hann er búinn að vera síðan á miðvikudaginn. Við höfum reynt að gera sitt lítið af hverju með honum, m.a. hjóluðum á Bakken á laugardaginn og fórum út að borða í gærkveldi. Reyndar var Auður Ísold komin með hita þegar við sóttum hana á leikskólann á fimmtudaginn en var orðin hitalaus á föstudaginn og hefur verið hress síðan. Fjalar Hrafn tók sér svo frí í sínum leikskóla á föstudaginn og var meira og minna út með afa sínum þann dag.
Ferðin norður á Bakken var skemmtileg. Ekki tók lengur en 5 korter að hjóla þessa 14,5 km. leið. Reyndar gátum við lítið verið í skemmtigarðinum vegna geitunga og stoppuðum því lengur við á ströndinni án þess þó að fara í sjóinn.
Þórir
Newer | Latest | Older
